ليه المؤسسات الدولية شايفة إن الجنيه هيعمل أداء قوي في 2025؟وإيه علاقة الطروحات الحكومية وجذب الاستثمارات الأجنبية بتخفيف أزمة الدولار؟ وهل فعلاً الجنيه هيستعيد استقراره الفترة الجاية؟ ولا الأزمة هتطول أكتر؟
كلنا عارفين إن سوق الصرف في مصر كان مضطرب جدًا في 2023 و2024.. والدولار بقى عامل صداع لكل الناس من المواطنين لحد المستثمرين.. لكن فجأة، التقارير الدولية بدأت تتكلم عن إن الجنيه المصري ممكن يكون من العملات اللي هتقدم أداء مميز جدًا في 2025.
طب إزاي؟ وإيه اللي حصل؟
خلينا نقولك إن في عوامل كتير وراء التوقعات الإيجابية دي.. وأولها الإصلاحات الاقتصادية اللي الحكومة شغالة عليها حاليًا.. الطروحات الحكومية بقت محور الكلام في الفترة الأخيرة.. والدولة بتمهد الطريق لجذب استثمارات أجنبية ضخمة من خلال طرح حصص في الشركات الكبرى.
إيه هي الطروحات الحكومية دي؟
ببساطة.. الدولة بتطرح حصص في شركات مملوكة ليها.. سواء كانت شركات بترول.. بنوك .. أو حتى شركات في قطاعات زي النقل والكهرباء.. والهدف من الطروحات دي هو إدخال سيولة أجنبية مباشرة للسوق المصري
طيب ليه ده مهم؟
لإن السيولة دي بتدخل على هيئة عملات أجنبية.. وده معناه إن الدولار اللي كان شحيح في السوق هيبقى متوفر أكتر.. وده هيخفف الضغط على العملة المحلية ويزود ثقة المستثمرين في الجنيه.
والمؤسسات الدولية شايفة إيه؟
تقارير مؤسسات زي صندوق النقد الدولي وبلومبرج شايفة إن مصر بتتحرك في اتجاه صح لإنعاش الاقتصاد..والطروحات الحكومية بقت عنصر جذب للمستثمرين الأجانب وخصوصًا من دول الخليج.. وده انعكس في استثمارات ضخمة من الإمارات والسعودية تحديدًا اللي بدأت تضخ فلوسها في الشركات المصرية.
صندوق النقد كمان نوّه إن الإصلاحات دي لو استمرت بنفس الوتيرة هيبقى عندنا بيئة اقتصادية أكثر استقرارا وده معناه إن الجنيه ممكن يكسب أرضية قوية قدام الدولار في 2025
وإيه علاقة ده بأزمة الدولار؟
أزمة الدولار في مصر كانت واحدة من أصعب الأزمات اللي شوفناها في السنين اللي فاتت.. لكن الحل مش مستحيل.. لما الدولة تجذب استثمارات أجنبية مباشرة الفلوس دي بتدخل السوق المصري وبتخفف الضغط على الاحتياطي النقدي.. كمان دخول مستثمرين أجانب مش بس بيوفر سيولة دولارية لكنه بيحسن ثقة المستثمرين في الاقتصاد المصري وده بينعكس على سعر الجنيه قدام الدولار.
ولما مستثمر أجنبي يقرر يضخ فلوسه في مصر ده معناه إنه شايف إن السوق فيه فرص حقيقية للربح.. الطروحات الحكومية مش بس بتجيب سيولة لكنها بتدي رسالة للمستثمرين مفادها مصر بتتحرك في الاتجاه الصح.
الحكومة كمان بتشتغل على ملفات تانية زي تسهيل بيئة الأعمال وتحسين قوانين الاستثمار.. وده بيخلي السوق المصري أكتر جذبًا للمستثمرين.
إزاي ده هيأثر على الجنيه؟
لما الاستثمارات الأجنبية تزيد والطروحات الحكومية تدخل سيولة جديدة.. الجنيه هيستفيد بشكل مباشر.. الطلب على الدولار هيقل والضغوط اللي كانت موجودة على سوق الصرف هتخف تدريجيا.. وده هيؤدي لاستقرار سعر الصرف ولو الإصلاحات استمرت بنفس القو ممكن نشوف أداء قوي جدا للجنيه في 2025 زي ما المؤسسات الدولية متوقعة.
