يا ترى مصر ممكن فعلا تنجح في جذب 1.5 مليار يورو استثمارات أوروبية في 2025؟ وايه أهمية المبلغ الكبير ده ؟ وهل ممكن يساهم في حل أزمة نقص العملات الأجنبية في مصر؟ وايه اصلا حجم الاستثمارات الأوروبية عندنا ؟ و ليه المستثمرين الأوروبيين شايفين مصر فرصة ذهبية دلوقتي؟”
في 2025.. مصر عندها خطة طموحة جدا لجذب 1.5 مليار يورو استثمارات جديدة من دول الاتحاد الأوروبي.. والكلام ده مش أمنيات أو وعود.. رئيس جهاز التمثيل التجاري يحيى الواثق بالله أكد إن الفلوس دي هتيجي في قطاعات استراتيجية جدا زي الطاقة الجديدة والمتجددة والسيارات والصناعات المغذية ليها والتصنيع الزراعي.
كمان الحكومة بتستهدف جذب شركات أوروبية عملاقة زي اللي حصل مع شركة “بوش” الألمانية اللي دخلت السوق المصري مؤخرًا.. وده بيوضح إن الاستثمار الأوروبي في مصر مش بس بيكبرده كمان بيدخل قطاعات أكتر تنوعا وأهمية.
طب إيه أهمية الاستثمارات دي؟ وهل ده ليه علاقة بأزمة الدولار؟
الاستثمارات الأجنبية المباشرة زي دي بتعتبر “حقنة أوكسجين” لأي اقتصاد.. خصوصًا لو الاقتصاد بيعاني من نقص في العملة الصعبة زي الدولار.. وخليني أوضحلك أول حاجة، دخول 1.5 مليار يورو يعني توفير عملة صعبة مباشرة في السوق.. ثانيا.. الفلوس دي بتدخل قطاعات إنتاجية يعني بتخلق فرص عمل جديدة وبتزود الإنتاج المحلي.. ثالثا والأهم إن المشاريع دي بتقلل اعتمادنا على الاستيراد وده يقلل الضغط على الدولار في السوق.
وخد بالك الاتحاد الأوروبي مش جديد على الاستثمار في مصر.. حاليًا أوروبا بتستثمر في مصر بحوالي 13.1 مليار دولار من خلال أكتر من 6900 شركة شغالة بالفعل.. والدول الأكثر استثمارا فى مصر هي هولندا، إيطاليا، فرنسا، بلجيكا، وإسبانيا، اللي لوحدهم بيمثلوا حوالي 78% من إجمالي استثمارات أوروبا في مصر.
كمان الاتحاد الأوروبي هو الشريك التجاري الأول لمصر.. التجارة معاه بتشكل حوالي 27% من إجمالي تجارة مصر الخارجية.. يعني العلاقة بين مصر وأوروبا مش بس استثمارات لكن كمان تبادل تجاري قوي جدا.
طب السؤال اللي ممكن تسأله دلوقتي هل الاستثمارات دي كفاية عشان تحل أزمة الدولار؟
الحقيقة إن جذب 1.5 مليار يورو خطوة ممتازة.. لكنها مش الحل النهائي.. الاستثمارات دي بتساعد في تخفيف الأزمة لكنها محتاجة تمشي جنبًا لجنب مع إصلاحات أكبر زي زيادة الصادرات وتقليل الواردات وتنظيم سوق الدولار بشكل أفضل.
خلاضة الكلام ان استثمارات الاتحاد الأوروبي فرصة كبيرة لمصر في 2025.. لكن السؤال اللي لسه مطروح وبقوة .. هل الحكومة هتنجح في تنفيذ الخطة دي؟ وهل الاستثمارات دي كفاية عشان نحل أزمة شح العملة الصعبة؟
