متابعينا الكرام في كل مكان أهلا وسهلا بكم ورصد جديد لأهم التقارير اللي قدمتها وحدة أبحاث على مدار الساعة النهاردة الاثنين 6 يناير 2025.
والحقيقة منصات بانكير قدمت النهاردة عدد كبير ومهم من التقارير والتحليلات في الشأن الاقتصادي المصري.
والبداية مع تقرير خاص عن اخر تقارير دولية صدرت عن الاقتصاد المصري ومستوى المعيشة للمصريين .. وللحقيقة التقرير الدولي نصف الحكومة المصرية واثني على جهودها في تحسين مستوى المعيشة للمواطنين ودا اللي خلي مصر تتصدر افريقيا في تحسن الوضع المعيشي والاقتصادي.
ولفت التقرير إن منصة بيزنس أفريكا وهي منصة معتمدة دوليا وعندها سمعة وثقة في كل مؤشراتها الاقتصادية وعندها فريق ابحاث ممتاز اختارت مصر في صدارة قائمة أفضل خمس دول إفريقية من حيث مؤشر جودة الحياة لسنة 2025 والمنصة شايفة إن صدارة مصر لمؤشر جودة الحياة نابع من نجاح الحكومة في إحداث توازن في جهود الدولة بين تحقيق التنمية المستدامة ومواجهة التحديات الاقتصادية اللي بيعيشها العالم.
وقال التقرير إن مصر احتلت كمان مركز متميز في بيانات مؤشر “نيمبو” لتكلفة المعيشة في العالم ودا بيأكد على سعيها المستمر لتحسين مستوى معيشة مواطنيها وتعزيز جودة الحياة وضمت القايمة جنوب إفريقيا وتونس والمغرب وكينيا بجانب مصر وحسب التقرير الدول دي شهدت تقدم ملحوظ في مستويات المعيشة والخدمات الأساسية.
وشرح تقرير بانكير إن مؤشر “نيمبو” دا بيعتبر أداة قياس شاملة لجودة الحياة وبيعتمد على تقييم الظروف المعيشية في المدن والدول بناء على معايير متعددة زي القوة الشرائية وتكاليف السكن وجودة الرعاية الصحية ومستوى الأمان وأوقات التنقل والمناخ ومستويات التلوث و ارتفاع المؤشر في أي دولة معناه إن جودة حياة فيها أفضل وعشان كده بيعتبر من اكتر المؤشرات العالمية لمقارنة مستويات المعيشة في مختلف أنحاء العالم .
منصات بانكير قدمت تقرير مختلف النهاردة عن أسعار الدولار في السوق المصرفي ومصير الجنيه المصري..
وقال التقرير إن سعر الدولار نزل حوالي 25 قرش في خلال 6 ايام من 50.80 جنيه يوم الإثنين اللي فات إلى 50.55 جنيه النهاردة والأهم أن الدولار واخد اتجاه عام نزولي وحسب العرض والطلب ومن غير اي اضطرابات ولا قفزات مفاجئة زي ما كان بيحصل قبل كده وإن العبرة بتوافر الدولار في البنوك مش في سعره ولان الدولار متوفر في البنوك المصرية ومن موارد حقيقية يبقي مفيش خوف علي سوق الصرف وكمان فيه أسباب تانية كتير ورا عودة الجنيه وهي المؤشرات الاقتصادية واللي اتحسنت بشكل كبير وزيادة الموارد الدولارية وانتهاء المستوردين من شراء سلع شهر رمضان.
وسلط التقرير الضوء على تصريحات وزير المالية الأخيرة واللي أكد فيها أن الحكومة السنة دي 2025 هتسدد 19 مليار دولار من موارد حقيقية وجزء بسيط منها من برامج التمويل الدولية ودا ادي ثقة كبيرة جدا في سوق الصرف لأن الديون كانت عبء كبير وكان فيه خوف إنها هتسحب جزء كبير من السيولة الدولارية لكن كلام الوزير أكد أن أقساط الديون موجودة يعني مش هيحصل أزمة.
تقرير بانكير شرح كمان إن تصريحات الوزير اللي قال فيها إن سنة 2025 هتكون افضل بكتير من 2024 واللي كانت فيها تحديات خطيرة وإن السنة دي هيكون فيه تحسن في الوضع الاقتصادي ومفيش زيادات في أسعار الوقود ولا البنزين ولا الكهرباء ولمدة 6 شهور جاية كان ليها تأثير مباشر على أسعار الدولار.
وحدة ابحاث بانكير قدمت النهاردة تقرير عن المكاسب الاقتصادية للمناطق الحرة.
وأشار التقرير إن الحكومة بتتوسع دلوقتي في المشروعات الاقتصادية اللي هتدر عائد مادي يقدر يسند الموازنة العامة للدولة ومن بين المشروعات الاقتصادية دي، هو مشروعات المناطق الحرة، زي مثلا المنطقة الحرة بمدينة نصر، فالحكومة قررت تتوسع في تنفيذ المناطق الحرة لأنها بتعتبر من أفضل الأنماط الاستثمارية المتميزة في مصر.
وكشف التقرير إن فيه حالي 9 مناطق حرة عامة في الإسكندرية وتحديدا في العامرية، والقاهرة في مدينة نصر، كمان في بورسعيد والسويس والإسماعيلية ودمياط وشبين الكوم وقفط والمنطقة الإعلامية بمدينة 6 أكتوبر، وبتعتبر منطقة الإسكندرية هي الأكبر على مستوى الجمهورية ومقام عليها 1095 مشروع باستثمارات بلغت 26.1 مليار دولار حتى سنة 2023.
وحسب التقرير منطقة مدينة نصر الحرة بتعتبر واحدة من أكبر وأقدم المناطق الحرة العامة المصرية، واتأسست سنة 1973، وموجودة على بعد 25 كم من مطار القاهرة الدولي، وتم تطوير البنية التحتية فيها بتكلفة حوالي مليار جنيه.
والمنطقة دي بترتبط بعدد من المواني البحرية والمحافظات المختلفة في جميع أنحاء الجمهورية، ومنح موقعها في العاصمة شوية مزايا كويسة، زي توافر الكوادر البشرية المتميزة بالتدريب والمهارات اللي بتمكن المستثمرين من الاستفادة من الكوادر بأسعار تنافسية.
وشرح التقرير إن عدد المشروعات العاملة بالمنطقة الحرة بمدينة نصر 206 مشروع برؤوس أموال بلغت 3.8 مليار دولار واستثمارات نحو 7 مليار دولار، وكمان سجلت حجم صادرات بقيمة 1.8 مليار دولار، وبتتنوع الأنشطة الصناعية منها صناعة الأدوية والخدمات وغيرها.
وأكد التقرير إن المناطق الاستثمارية دي بتعتبر أبواب خير كبيرة، بتوفر فرص عمل وكمان بتقوم بدورها بضخ موارد دولارية في شريان الاقتصاد.
