مدبولي اجتمع مع كبار رجال الأعمال والمستثمرين في مصر.. ياترى ايه اللي حصل في الاجتماع وإزاي الحكومة بتخطط لتسليم الراية للقطاع الخاص وازاي الاجتماع دا هيقلب موازين الاقتصاد المصري في الفترة الجاية.
معروف في كل دول العالم المتقدمة أن القطاع الخاص هو المحرك والقائد الاول للاقتصاد بكل قطاعاته ودور الحكومات هناك الاشراف بس وتهيئة الظروف لزيادة الاستثمار والمشروعات وعشان كده شفنا أن اقتصاد أمريكا مثلا قائم على القطاع الخاص وعلى الشركات العملاقة اللي بتشتغل بحرية وشفافية وفي منافسة مستمرة مع الشركات التانية والنتيجة إن كل شركة بتقدم افضل ما لديها عشان تكمل في السوق وهنا ظهرت فكرة البراندات والماركات العالمية في كل قطاعات التصنيع ودا لأنها جاية من الجودة ثم الجودة.
وفي أمريكا شركات في القطاع الخاص قيمتها تفوق ميزانية قارة زي افريقيا بكل ثرواتها زي شركة آبل واللي قيمتها قربت على 4 تريليون دولار يعني 4 آلاف مليار دولار وغيرها من الشركات العالمية اللي اقتصاد دولها قايم على أكتافها وبتشغل ملايين العمالة بمرتبات مجزية توفر حياة الرفاهية ودا لأن الشركات دي بتكسب مليارات الدولارات كل سنة وأمكن كل يوم كمان.
طيب ايه المشكلة عندنا وليه مفيش شركات ضخمة في مصر بقيمة الشركات العالمية ؟
على مر السنين كانت المشكلة في مصر هي أن القطاع الخاص مش واخد فرصة حقيقية ودا لأسباب كتير أولها الروتين والبيروقراطية ودا اللي اعترف بيه الدكتور مصطفى مدبولي رئيس الحكومة في اجتماعه الأخير مع رجال الأعمال والمستثمرين المصريين واللي بيعتبر أهم اجتماع للحكومة في 2024 لأنه لأول مرة يتم الاستماع باستفاضة لرموز القطاع الخاص ولاول مره الحكومة تحط ايديها على مصدر المشكلة من خلال كلام كبار المصنعين والمستثمرين ورجال الأعمال ويتم الاتفاق على مرحلة جديدة وانطلاقة مختلفة للقطاع الخاص المصري واللي بيملك إمكانيات ضخمة وفيه شركات قدرت تعبر الحدود وتبقي سفيرة لمصر زي مجموعة طلعت مصطفى والسويدي والعز والمقاولين العرب واوراسكوم.
خلال الاجتماع مع رن رموز القطاع الخاص أعلن رئيس الوزراء مصطفى مدبولي تشكيل مجموعات استشارية من رجال القطاع الخاص في مختلف المجالات وده خلال 48 ساعة لبحث وحل كل مشكلاتهم ومقترحاتهم واعترف مدبولي بعدم تنفيذ قرارات يتم اتخاذها على أرض الواقع بسبب البيروقراطية وقال إننا محتاجين تحسين مناخ الاستثمار في مصر، وتغيير الصورة الذهنية عن مناخ الاستثمار في مصر.
وأكد مدبولي، خلال لقائه مجموعة من المستثمرين في مختلف القطاعات أن الحكومة تعمل على تسريع وتيرة مشاركة القطاع الخاص في الاقتصاد الوطني وإن مفيش وقت والتغيرات العالمية الحالية بتفرض ضرورة التحرك بسرعة دون التمسك بخطط طويلة الأجل وتعهد بلتمكين القطاع الخاص رغم التحديات الإدارية الموجودة.
الخلاصة الحكومة عازمة على تسليم الراية للقطاع الخاص عشان يشتغل وينطلق ويتوسع ودا هينعكس على مجمل القطاعات الاقتصادية وهيوفر فرص عمل والأهم هيطلع منتجات بجودة عالمية وتتولد كيانات اقتصادية ضخمة زي اللي بنشوفها في أوروبا وامريكا .
