إيه هي الطريقة اللي تخليك تنظم فلوس العيلة؟ وازاي تقدر تخلي كل أفراد أسرتك يشاركوا في إدارة المصاريف من غير وجع دماغ؟ هل في حساب بنكي ينفع تشترك فيه مع شريك حياتك أو حتى أفراد أسرتك كلها؟ ولو فيه.. شروطه إيه؟
فى الاول خلونا نعرف إيه هو الحساب البنكي المشترك؟
الحساب البنكي المشترك هو حساب تقدر تفتحه مع فرد أو أكتر من أفراد أسرتك.. ممكن يكون شريك حياتك، أولادك، أو حتى إخواتك.. الحساب ده هدفه إنه يسهل عليكم إدارة المصاريف مع بعض سواء كنتوا عيلة صغيرة أو كبيرة.. يعني بدل ما كل واحد يكون عنده حساب منفصل الحساب ده بيجمع الكل تحت سقف واحد
ليه الناس بتتجه للحسابات المشتركة؟
أول حاجة لو عندك مصاريف عائلية زي أقساط مدارس، فواتير شهرية، أو حتى رحلات وسفر.. الحساب المشترك بيخلي الأمور أسهل.. تاني حاجة لو بتخططوا لمشروع عائلي زي شراء بيت جديد أو استثمار معين الحساب ده بيبقى أداة ممتازة لتتبع الفلوس.. وأخيرًا، بيكون أداة عملية لتعليم أولادك إزاي يديروا فلوسهم بذكاء
.خلونا ندخل على أهم سؤال.. إيه الشروط اللي محتاج تعرفها عشان تفتح حساب مشترك؟
لازم كل الأطراف اللي هيشاركوا في الحساب يكونوا فوق السن القانوني اللي هو 21 سنة ولو فيه أطفال هيكون ليهم حسابات تابعة ده بيتطلب وصاية من ولي الأمر.. وكل شخص هيشارك في الحساب لازم يقدم بطاقة رقم قومي أو جواز سفر ساري.. ولو الحساب بين أفراد العيلة البنوك ممكن تطلب إثبات علاقة زي شهادة ميلاد أو عقد زواج.. وده عشان تتأكد إن الحساب مخصص لأغراض عائلية مش تجارية.. وكل الأطراف لازم يمضوا على اتفاق إدارة الحساب وده بيحدد هل الحساب هيكون بتوقيع فرد واحد بس لسحب الفلوس ولا لازم توقيع جماعي لكل الأطراف
وخد بالك البنوك بتطلب حد أدنى للإيداع أول ما تفتح الحساب الرقم ده بيتراوح في 2025 بين 5000 و10,000 جنيه في أغلب البنوك.. ولازم تحدد مين له صلاحية السحب والإيداع ومين يقدر يدير الحساب أونلاين.. التكنولوجيا دلوقتي خلت إدارة الحسابات أسهل بس لازم يكون فيه شفافية بين كل الأطراف
طب ايه أهم مميزات الحساب المشترك في 2025؟
خد عتدك.. كل أفراد العيلة يقدروا يتابعوا رصيد الحساب وتحركاته أونلاين من خلال تطبيق البنك.. وفيه بطاقة خصم لكل طرف مشارك بحيث الكل يقدر يستخدم الحساب في أي وقت ..كمانالحساب بيوفر مزايا أمان عالية زي تحديد حد للسحب اليومي أو الإشعارات الفورية لكل عملية
وإيه اللي لازم تاخد بالك منه؟
الحسابات المشتركة محتاجة شفافية تامة بين الأطراف يعني لازم كل طرف يكون عارف التحركات المالية ومافيش أسرار.. وفي حالة الخلافات، البنك ممكن يجمّد الحساب مؤقتًا لحد ما يتم حل المشكلة بين الأطراف
زلازم تكون عارف الحساب البنكي المشترك هو حل عملي لأي عيلة بتحاول تنظم فلوسها وتشتغل كفريق واحد.. لكن قبل ما تاخد الخطوة دي اتأكد إن كل التفاصيل واضحة بينك وبين أفراد أسرتك.
