خلاص انا علي بداية شهر رجب، وطبعا كل الناس من دلوقتي بتبدأ تستعد لشهر رمضان وتوفير السلع للمواطنين.. ياتري الحكومة بتستعد ازاي لشهر رمضان.. وهل اسعار السلع هترتفع قبل بداية الشهر الكريم.
مع كل بداية لشهر رمضان، بيكون في اقبال كبير جدا من الناس علي شراء السلع الغذائية وده اللي الناس بتسميه خزين رمضان، وكل الزملاء قبل الشهر الكريم بتنزل تشتري كل احتياجاتها من السلع سواء زيت أو سكر أو مكسرات أو الحاجات اللي الناس بتعتمد عليها خلال الشهر الكريم.
وزي ما الناس بتستعد لشهر رمضان، الحكومة كمان بتستعد لشهر رمضان، وفعلا الحكومة عطت اولوية كبيرة للملف ده لتعزيز الأمن الغذائي وضمان توافر السلع الأساسية بأسعار مناسبة في المنافذ الاستهلاكية والشوادر واللي بتشهد إقبال كبير من المواطنين لشراء السلع الأساسية بأسعار مخفضة زي اللحوم والأرز والمكرونة والزيوت، ده غير السيارات المتنقلة اللي بتلف المناطق المختلفة، والهدف منها هو توفير السلع للمواطنين بأسعار مدعومة، وده في اطار شعور الدولة باحتياجات المواطنين.
الحكومة في الفترة اللي فاتت دعمت توفير السلع الأساسية بأسعار مخفضة من خلال 40 ألف منفذ ثابت ومتحرك، ده غير بقالي التموين، ومنافذ جمعيتي والمجمعات الاستهلاكية والسيارات المتنقلة، والدولة وفرت مخزون احتياطي استراتيجي من السلع الأساسية بيكفي لمدة 6 أشهر، وده ساهم في استقرار الأسواق وتلبية احتياجات المواطنين في أوقات الأزمات .
طيب الدولة بتدعم السلع بميزانية قد اية؟.
خطة وزارة التموين والتجارة الداخلية لعام 2024/2025 تضمنت تخصيص أكثر من 134 مليار جنيه لدعم الخبز والسلع التموينية، لتوفير الخبز المدعم لـ 69.5 مليون مواطن، ده غير تقديم 30 سلعة أساسية في البطاقات التموينية لـ 61.5 مليون مستفيد، وحاليا الدولة شغالة علي خطة زيادة السعة التخزينية للصوامع بهدف تقليل الفاقد من الحبوب وضمان استقرار الأسواق، ومتوقع أضافة طاقة تخزينية هتوصل إلى مليون طن خلال السنة اللي جاية .
خطة الدولة لسنة 2025، بتستهدف التوسع في أسواق اليوم الواحد في المناطق الشعبية ذات الكثافة السكانية العالية وده بهدف اتاحة الفرصة للمواطنين لشراء الخضروات والفواكه واللحوم والدواجن بأسعار بتقل عن السوق بنسبة تتراوح بين 20% و30%.
الحكومة حاليا بتهدف كمان لتعزيز إنتاج السكر من خلال إنشاء مصانع جديدة وزيادة كفاءة المصانع القائمة زي مصنع الدلتا الجديد في كفر الشيخ واللي متوقع أن يضيف 250 ألف طن سنويا، وخطة الدولة بتستهدف كمان توفير احتياطي استراتيجي من السكر هيكفي لمدة مش هتقل عن 6 أشهر لحماية السوق من أي تقلبات عالمية.
خطة الدولة لتامين المخزون الاستراتيجي من السلع بتهدف كمان لتوفير السلع الأساسية لمدة 6 أشهر على الأقل، ده غير طرح كراتين رمضان بأسعار تتراوح بين 400 و 800 جنيه، وده بهدف تخفف العبء عن الأسر المصرية خلال ايام الشهر الكريم، وفي الفترة اللي فاتت الوزارة عملت أكبر مناقصة لتوفير الزيوت واللحوم والدواجن لضمان استقرار السوق وتلبية احتياجات المواطنين، خصوصا في أوقات الأزمات.
