سمعت عن أزمة الدولار في مصر؟ طب تعرف ان في ناس كتير بتتكلم عن موضوع الدولار ده وكأن فيه أزمة كبيرة.. لكن يا ترى الكلام ده حقيقي فعلا وفيه مشكلة ضخمة فى توفير العملة الصعبة ولا فيه مبالغات كتير فى القصة دي؟ وهل الحكومة قادرة انها توفر الدولار وتسدد التزاماتها الخارجية ؟ والأرقام بتقول ايه فى الحكاية دي كلها؟
في الفترة الأخيرة .. فيه بعض الأقاويل اللي بتتداول عن وجود أزمة دولار في مصر.. وإن الوضع الاقتصادي في خطر.. لكن الحقيقة على الأرض مختلفة تمامًا.. مصر أثبتت إنها قادرة على توفير العملة الصعبة وكمان تسديد التزاماتها المالية بشكل منتظم.. هل تصدق لو قلتلك إن الدولة المصرية قدرت تفرج جمركيًا عن بضايع بقيمة 79 مليار دولار في سنة واحدة؟.. ده بيأكد لنا حاجة مهمة جدًا إن الحكومة بتملك القدرة على تأمين العملات الصعبة لتلبية احتياجات السوق.
و الإفراج الجمركي ده للى ميعرفش معناه إنه تم السماح للبضائع المتراكمة في الموانئ بالتحرك بعد الدفع الجمركي.. وده ساعد بشكل كبير في توفير بضايع كانت محجوزة لوقت طويل.. مصر لما قدرت تفرج عن السلع اللي كانت محتجزة ده معناه إنها قدرت تحرك السوق المحلي وتوفر الدولار عشان تلبية احتياجات الاقتصاد.. سواء كان للصناعات المحلية أو للبضائع المستوردة اللي الأسواق المصرية كانت محتاجاها.
طب لو لسه عندك شك في قدرة مصر على الوفاء بالتزاماتها هقولك رقم مهم حيغير رأيك.. مصر سددت 38.7 مليار دولار ديون مستحقة خلال عام 2024.. وده مش رقم قليل خالص ومش سهل إنك تدفعه لو كنت في أزمة فعلا.
طب إيه معنى الكلام ده كله؟
معناه إن الحكومة المصرية بتواصل التزامها تجاه الدائنين وبتثبت إنها قادرة على إدارة سياساتها المالية والاقتصادية بشكل مستدام.. وده بيحسن صورة مصر في الأسواق العالمية وبيزود الثقة فيها.
و هل ده معناه إن مصر مش في أزمة دولار؟
في الحقيقة مفيش أزمة كبيرة فى الدولار .. ولو كنت بتسمع أخبار عن أزمة في العملات الصعبة.. ده مش بيعبّر عن الواقع الاقتصادي في مصر.. الحقيقة إن مصر قادرة على تأمين مصادر عملة صعبة من خلال التجارة الخارجية وتوفير العملة للدوران الطبيعي في السوق المحلي.
اللي بيحصل في بعض الأوقات هو مجرد تشويش على الوضع الاقتصادي.. أما في الواقع الوضع مستقر والمصادر الاقتصادية بتعمل بشكل جيد جدا.
طب إزاي الحكومة قدرت تتعامل مع الوضع الصعب ؟
الحكومة المصرية قامت بتخطيط استراتيجي عشان تتعامل مع الوضع الاقتصادي الصعب وتضمن تأمين احتياجات السوق من الدولار من خلال إجراءات زي الإفراج الجمركي لزيادة تدفق العملة الصعبة.. وسداد الديون المستحقة في مواعيدها لتقوية العلاقة مع المؤسسات المالية العالمية.. وتعزيز الاستثمار الأجنبي عشان يزيد تدفق الدولار.
والأهم من كده، مصر مستمرة في تنفيذ إصلاحات اقتصادية واستراتيجيات مبتكرة عشان تحافظ على استقرار الوضع المالي والاقتصادي..و خطوة بخطوة الحكومة بتعزز ثقة المستثمرين سواء كانوا محليين أو أجانب.. وفي النهاية مصر مش في أزمة دولار. ما فيش حاجة اسمها أزمة حقيقية.. بس في تحديات بنواجهها وده طبيعي لأي اقتصاد في العالم المهم إننا نواجهها بأدوات واستراتيجيات فعّالة زي اللي بتنفذها مصر دلوقتي.
