مع بداية استحقاق شهادات الادخار في البنوك المصرية، كتير من عملا بنك مصر بيسألوا: إيه أخبار فوايد شهاداتنا، وأسعار الفايدة للسنة الجديدة 2025 هيبقي إيه نظامها، هل هتكون بنفس معدلات السنة اللي فاتت ولا في زيادة ولا أقل؟
دلوقتي القطاع المصرفي المصري بيترقب انعقاد اجتماع لجنة السياسة النقدية الجاية عشان تراجع أسعار الفائدة على الإيداع والإقراض في أول اجتماع للبنك المركزي المصري في السنة الجديدة 2025، واللي مقرر له يكون يوم الخميس 20 فبراير الجاي.
وطبعا شهادات الإدخار واحدة من أهم الأوعية الإدخارية اللي ناس كتير بتحط فلوسها فيها عشان تحفظ قيمتها، لأن مع التضخم قيمة الفلوس بتقل، فالناس بتدور على وعاء إدخاري زي الشهادات أو الدهب او العقارات عشان تدخر الفلوس فيها أو تستثمرها، بحيث تحفظ قيمتها وفي نفس الوقت تستفيد من الفايدة اللي بتطلع منها.
ومع توقعات المحللين والمصرفيين عن أسعار الفايدة الجديدة لسنة 2025، فبتميل الترجيحات للتخفيض على مدار السنة، وتحديدا خلال النصف التاني من 2025، وده هيكون لعدة أسباب، أهمها تراجع مستويات التضخم وموجة تخفيضات الفايدة من البنوك المركزية العالمية، ومنها البنك الفيدرالي الأمريكي.
ومع كتر الكلام عن الفايدة في 2025، هنقولك أسعار الفايدة على شهادات بنك مصر 2025 قبل اجتماع البنك المركزي، واللي أولها شهادة طلعت حرب، واللي بتوصل أسعار الفايدة فيها خلال 2025، ل 23.5% للعائد الشهري، و27% للعائد السنوي.
وبيبدأ الاكتتاب في الشهادة دي من 1000 جنيه ومضاعفات الألف، وبتصدر للأفراد سواء مصريين أو أجانب.
أما شهادة ابن مصر، والشهادة الثلاثية، فبتكون بعائد سنوي تدريجي للأفراد ومدتها 3 سنين، وبيبدأ الاكتتاب فيها من 1000 جنيه ومضاعفات الألف، وبتوصل أسعار الفايدة عليها ل 26% بنهاية السنة الأولى، و22.5% للسنة التانية، و19% للسنة التالتة.
ونقدر نقول إن أسعار الفايدة بتزيد على الشهادات دي وفقا لدورية صرف العائد، يعني مثلا لو الصرف سنوي فبيصل العائد ل 30% للسنة الأولى و25% للسنة التانية و20% للسنة التالتة، أما في حالة صرف كل 3 شهور، فبتوصل الفايدة ل 27% للسنة الأولى و23% للسنة التانية و19% للسنة التالتة.
كمان، بنك مصر بيصدر شهادات القمة للأفراد ومدتها 3 سنين، وبيبدأ الاكتتاب فيها من 1000 جنيه ومضاعفات الألف، وأسعار الفايدة عليها ثابتة مش بتتغير طوال مدة الشهادة، وهنا العائد بيصرف شهريا وبيوصل ل 21.5%.
فلو حضرتك ناوي تستثمر فلوسك في الشهادات، فاختار الشهادة اللي تناسبك وكمان دورية صرف الفايدة اللى تناسبك بردو، وتوكل على الله.
