إيه اللي بيحصل في البنوك اليومين دول وليه الدولار رجع ينزل تاني بشكل ملحوظ في التداولات الأخيرة وايه سر التصريحات الأخيرة اللي هزت عرش الاخضر ورجعت الجنيه من تاني.
الدولار هيضرب في العالي.. وخلو بالكم الجنيه مش راجع تاني واللي جاي صعب وخطير.. دي الجمل والعبارات اللي منتشرة على كتير من مواقع التواصل الاجتماعي وآلاف الصفحات المجهولة اللي بيديرها ويحركها الذباب الالكتروني اللي بتموله جماعات وأطراف معروفة لينا كلنا وفي الزيادة الأخيرة في الدولار ووصوله لحاجز الـ51 جنيه المنصات دي طلعت وقالت إن الدولار هينطلق والجنيه مش راجع تاني وكان الهدف طبعا نشر اليأس بين الناس وتسخين الشارع رغم أن الأسعار مزادش مع الارتفاع في سعر الدولار ولأنه كان ارتفاع مؤقت وطالع نازل.
ولو تابعنا سعر الدولار هتلاقيه مثلا نزل حوالي 25 قرش في خلال 6 ايام من 50.80 جنيه يوم الإثنين اللي فات إلى 50.55 جنيه النهاردة و25 قرش دي مش قليلة والأهم أن الدولار هياخد اتجاه نزولي والأهم اكتر إن الدولار ليه كبير وهو السوق اللي بيحكم سعره حسب العرض والطلب وإن مفيش اي تدخل في سعره ولازم نعرف إن سوق الصرف والعملات في البنوك زيها زي اي سلعة سعرها بيزيد لما المعروض يقل والعكس صحيح والموضوع مش فزاعة بتخوف الناس لكن فيه جهات مركزة اووي على الدولار على أساس أنه نقطقة ضعف الحكومة والحقيقة مش كده خالص والحكومة قدرت تسيطر على أخطر أزمة عملة في تاريخها الحديث بدليل انها حررت سعر الصرف.
طيب ايه خلى سعر الدولار ينزل تاني ؟
زي ما قلنا ولسه هنقول إن السوق والعرض والطلب هو اللي بيحدد سعر الدولار ومش مهم سعره كام الاهم يكون متوفر في البنوك ودا اللي أكد عليها خبراء السوق وقاله المصرفي المخضرم هشام عز العرب وقال إن العبرة بتوافر الدولار في البنوك مش في سعره ولان الدولار متوفر في البنوك المصرية ومن موارد حقيقية يبقي مفيش خوف علي سوق الصرف وكمان فيه أسباب تانية كتير ورا عودة الجنيه وهي المؤشرات الاقتصادية واللي اتحسنت بشكل كبير وزيادة الموارد الدولارية وانتهاء المستوردين من شراء سلع شهر رمضان وكمان تصريحات وزير المالية الأخيرة واللي أكد فيها أن الحكومة السنة دي 2025 هتسدد 19 مليار دولار من موارد حقيقية وجزء بسيط منها من برامج التمويل الدولية ودا ادي ثقة كبيرة جدا في سوق الصرف لأن الديون كانت عبء كبير وكان فيه خزف إن ها تسحب جزء كبير من السيولة الدولارية لمت كلام الوزير أكد أن أقساط الديون موجودة يعني مش هيحصل أزمة.
كمان الوزير قال إن سنة 2025 هتكون افضل بكتير من 2024 واللي كانت فيها تحديات خطيرة وإن السنة دي هيكون فيه تحسن في الوضع الاقتصادي ومفيش زيادات في أسعار الوقود ولا البنزين ولا الكهرباء ولمدة 6 شهور جاية ودا معناه أن الحكومة هتقدر تسيطر على التضخم واللي هيوصلنا لخفض سعر الفايدة وانتعاش الأسواق الاقتصادية والحركة التجارية.. وعلى فكرة فيه سبب تاني مهم لانخفاض الدولار وهو توجيهات الرئيس السيسي الأخيرة لوزراء البترول والنقل وللدكتور مدبولي في الملفات الاقتصادية واللي أكدت أن مصر في طريقها تكون مركز للتجارة الدولية وهتكون سوق رئيسية للاستثمار المباشر ودي كلها أخبار بتنعكس في النهاية على سزق الصرف وبتدي ثقة الجنيه المصري.
