مع بداية كل سنة بتتنافس البنوك المصرية في طرح شهادات ادخار واستثمار بفوايد عالية، عشان تقدر تجذب أكبر عدد من العملاء لها من ناحية، وكمان توفر سيولة مالية عندها تقدر تكفي بيها إحتياجاتها من ناحية تانية.
عشان كده، دلوقتي البنوك المصرية بتفكر تقفل السنة وتطرح شهادات ادخارية جديدة بفوايد أعلى من السنة اللي فاتت 2024، رغم إن لسه أسعار الفايدة ثابتة زي ما هي، بعد قرار البنك المركزي المصري بالابقاء علي سعر الفايدة للمرة السابعة على التوالي خلال الاجتماع الأخير للجنة السياسات النقدية المنتهي في 26 من شهر ديسمبر اللي فات.
طب يا ترى.. إيه هي أعلى شهادات ادخار موجودة في البنوك دلوقتي؟
دلوقتي يا سيدي، البنوك بتوفر خيارات استثمار لمدخرات العملاء بعوائد مميزة، وبتيجي الخطوة دي بالتزامن مع سياسات البنك المركزي اللي بتهدف لتعزيز الشمول المالي وتمكين جميع الفئات من الاستفادة من الخدمات المصرفية.
وبالنسبة للشهادات الأعلى عائد، فأولها شهادة طلعت حرب من بنك مصر، واللي هي صاحبت العائد الشهري بنسبة 23.5% والسنوي 27%.
وبالنسبة لشهادة طلعت حرب، فممكن جد الاكتتاب فيها ب 1000 جنيه ومضاعفاتها، والشهادة دي بتضمن للعميل عدد من المزايا، زي الاقتراض بضمان قيمتها، والتأمين على الحياة طوال فترة الشراء، وكمان إمكانية استرداد قيمتها بعد 6 شهور من شرائها.
ومن بنك مصر للبنك الأهلي، اللي هو كمان مازال بيطرح الشهادة البلاتينية لمدة 3 سنين، وبتبدأ من 1000 جنيه ومضاعفاتها، وهنا العائد الشهري بيكون 23.5% والسنوي 27%.
والشهادة البلاتينية دي بتيح للعميل مزايا من بينها الاقتراض بضمان قيمة الشهادة، والتأمين على الحياة طوال فترة الشراء، ومتاح كمان استرداد قيمتا بعد 6 شهور من الشراء.
أما بنك القاهرة، فبيقدم هو كمان شهادة البريمو لمدة 3 سنين بسعر فايدة متغير، ممكن يصل ل 19% بقيمة اكتتاب تبدأ بـ10 آلاف جنيه، وبيتم صرف عائدها شهريا.
كمان، البنك الأهلي الكويتي، بيطرح شهادة ثلاثية لمدة 3 سنين بعائد شهري بنسبة فائدة 22%، وبقيمة اكتتاب تبلغ 1000 جنيه ومضاعفاتها.
والشهادة دي بتسمح للعميل، الاقتراض بضمان قيمتها، وبتأمن على حياته طول فترة الشرا، كمان متاح استرداد قيمتها بعد 6 شهور من الشراء.
نيجي بقى لبنك الشركة المصرفية “سايب”، اللي بيطرح شهادة إكسلانس بلاس بفائدة 23% سنويا.
والشهادة دي بتمنح العميل ميزة الاقتراض بضمان قيمتها والتأمين على الحياة، وكمان متاح استرداد قيمتها بعد 6 شهور من الشراء.
وأخيرا البنك التجاري الدولي CIB، اللي بيقدم شهادة بريميوم بفايدة 20%، بيتم صرفها سنويا، بس لازم يكون الحد الأدني للإكتتاب في الشهادة دي مليون جنيه ومضاعفاتها بالألف جنيه.
فلو حضرتك ناوي تستثمر في الشهادات الإدخارية، فاختار الشهادة المناسبة لحالتك المادية وتوكل على الله.
