ليه شركات الغزل والنسيج التركية بتنقل مصانعها في مصر وايه سر ضغط المستوردين الاوروبيين على الاتراك لنقل المصانع لمصر وايه علاقة أمريكا بالموضوع.
من فترة وخاصة بعد تحسن العلاقات بين مصر وتركيا وتحولها لعلاقة استراتيجية خاصه مع زيارات الرئيس التركي طيب أردوغان لمصر حصل اهتمام تركي كبير بالاستثمار في مصر وبدأت شركات تركية كتير تنقل جزء كبير من مصانعها واستثماراتها للسوق المصري وخاصة صناعات النسيج واللي أعلنت شركات تركية كتير نقل وانشاء مصانع ليها في مصر.
طيب ايه السر في التوجه التركي للتصنيع في مصر ؟
الحقيقة في اكتر من سبب خلى السوق المصري مثالي بالنسبة للشركات التركية أولها ضغط العلامات التجارية الأوروبية للملابس على الشركات المصنعة في تركيا لنقل الإنتاج إلى مصر ودا ليه سبب تاني وهو إن المستوردين الاوربيين عاوزين يستفادو من اتفاقية التجارة الحرة بين مصر و امريكا او الكويز واللي بمقتضاها صناعة الملابس الجاهزة المصرية بتدخل السوق الأمريكية بميزات كبيرة ومنها التخفيض الجمركي الكبير ودا بيديها ميزة إضافية في المنافسة بالسوق الأمريكية وهنا المستوردين الاوربيين هيحصلوا عليها بأسعار تنافسية ويضمنوا تلبية كل وارداتهم من المصانع التركية في مصر.
ومن الأسباب التانية اللي اغرت شركات تصنيع الملابس الجاهزة التركية للانتقال للسوق المصري هو اللي قاله تقرير موقع تركيا توداي على لسان رئيس جمعية مصنعي الملابس التركية رمضان كايا واللي أكد أن التحول للسوق المصري مدفوع بانخفاض تكاليف العمالة واتفاقيات التجارة الاستراتيجية مع مصر.
ولأن التكلفة من أهم عوامل المنافسة بين الشركات العالمية كايا قال ان التكلفة الإجمالية للعامل في مصر تبلغ 150 دولار فقط شهريا مقارنة بـ 1000 دولار في تركيا وطبعا الفرق كبير جدا ودا هيوفر ملايين الدولارات للشركات التركية كل سنة وطبعا التفاوت في تكلفة العمالة له تأثير خاص في القطاعات كثيفة العمالة زي تصنيع الدنيم ودا بيسرع الاتجاه نحو مراكز الإنتاج المصرية حسب المسؤول التركي.
وزي ما قلنا المسؤول التركي قال إن اتفاقية التجارة الحرة بين مصر والولايات المتحدة تشكل عامل جذب رئيسي وان العلامات التجارية الأوروبية بتحفز المنتجين الأتراك على التوسع في مصر لتأمين عقود طويلة الأجل وعشان كده شركات ملابس تركية قررت نقل مصانعها زي شركة تصنيع الدنيم التركية، دنيم رايز، باستثمارات 8.8 مليون دولار في المنطقة الصناعية غرب القنطرة في مصر واللي من المقرر توظف 1000 عامل مصري ما يعكس اتجاه متزايد للشركات التركية لنقل العمليات كثيفة العمالة إلى مصر والمصنع هيصدر 70% من إنتاجه في مصر للخارج ودا هيعزز من تحول مصر لمركز للتجاره الدولية.
كمان شركة إروغلو القابضة تعهدت بإنشاء مصنع بقيمة 40 مليون دولار في نفس المنطقة، بهدف إنتاج 7.2 مليون جينز سنويًا وخلق 3000 فرصة عمل وخبراء صناعة الملابس الجاهزة شايفين أن الاهتمام التركي بالتصنيع في مصر استجابة لضغوط السوق وفرصة للحفاظ على القدرة التنافسية وزي ما احنا عارفين إن صناعة الملابس الجاهزة التركية متقدمة جدا عالمياً وتركيا بتصدر بحوالي 22 مليار دولار سنويا ونقل مصانعها لمصر هيوفر فرصة ذهبية لتطور الصناعة المصرية لأنها هتنقل الخبرات التركية من خلال العمالة المصرية وكمان هيساعد في توسيع قاعدة صناعة الملابس الجاهزة في مصر وقدرتها على التصدير ودا غير توفير آلاف من فرص العمل للشباب.
طيب مصر بتقدم ايه عشان تجذب الشركات العالمية ؟
الحقيقة مصر بتقدم حوافز كبيرة للمستثمرين وخاصة في مناطقها الحرة واللي بقت بمثابة مغناطيس للمصنعين الأتراك الساعين للاستفادة من التكاليف المنخفضة والاتفاقيات التجارية واتساع الأسواق بجانب موقع مصر الجغرافي المميز والبنية التحتية الحديثة في المواني واللوجستيات والطاقة والنقل.
