رغم الأزمات والمشاكل الكبيرة اللى بتعانى منها مصر الا إن الاقتصاد المصري دلوقتي بينمو بأسرع وتيرة ليه في آخر سنة ونص؟! .. فيا ترى هل ده معناه إننا خلاص عبرنا المرحلة الصعبة؟ وازاي النمو ده بيتحقق في ظل ظروف عالمية صعبة ومشاكل محلية كبيرة اهمها استمرار نزيف ايرادات قناة السويس؟ والأهم إزاي الحكومة تبنى على اللى بيحصل ده ؟
في بيانات حديثة وزارة التخطيط كشفت ان الاقتصاد المصري حقق نمو 3.5% خلال الربع الأول من السنة المالية 2024-2025.. ودي أسرع وتيرة نمو في آخر 18 شهر.
طب يا ترى إيه السبب في النمو اللي بيحصل ده ؟
قطاع الصناعات التحويلية لعب دور البطولة فى النمو اللى بيتحقق بمعدل 7.1% على أساس سنوي.. وده بفضل الإصلاحات اللي الحكومة طبقتها بداية من مارس 2024.. زي تسهيلات الإفراج الجمركي اللي ساعدت المصانع ترجع تدور عجلة الإنتاج بعد فترة ركود طويلة.. بس على الناحية التانية قناة السويس لسه بتنزف.. الإيرادات انخفضت بنسبة كبيرة وصلت لـ63% في 3 شهور بس.. وده نتيجة لاضطرابات الملاحة في البحر الأحمر بسبب هجمات الحوثيين.
الهجمات دي بدأت من أواخر 2023 وقلبت الدنيا على شركات الشحن العالمية.. اللي بقيت متجنبة المرور من البحر الأحمر.. و النتيجة السفن بتدور حوالين أفريقيا بدل ما تستخدم القناة.. وخلال 2024 لوحدها.. قناة السويس خسرت أكتر من 7 مليارات دولار.
أما قطاع البترول .. فالأرقام كانت صادمة.. الإنتاج انكمش بنسبة 6.2%.. والغاز الطبيعي بنسبة 18.8%.. بس الحكومة عندها خطة لتعويض الخسائر دي قريب.. والاتفاق الجديد مع شركات النفط الأجنبية بخصوص سداد المتأخرات اللي كانت وصلت لـ4.5 مليار دولار فتح الباب لزيادة الإنتاج خلال الشهور الجاية.. يعني ممكن نشوف تحسن واضح في القطاع ده قريب جدًا.
نيجي للسؤال المهم .. هل مصر في طريق التعافي؟
رغم التحديات الكبيرة.. فيه إشارات إيجابية بتقول إن الاقتصاد في طريقه للتحسن التدريجي.. السياحة مثلاً حققت نمو بنسبة 8.2% وقطاع النقل والتخزين كان الأعلى بنسبة 15.7%.. كمان الاتصالات والتكنولوجيا نمت بنسبة 12.15%.
صندوق النقد الدولي بيتوقع إن الاقتصاد المصري ينمو بنسبة 4.1% للسنة المالية دي.. ووزارة التخطيط بتقول إننا ممكن نوصل لـ4%.. صحيح ان ده مش الرقم المستهدف الأول (4.2%)، لكنه خطوة للأمام.
وخد بالك الإجراءات اللي خدتها الحكومة زي توحيد سعر الصرف وتوقيع اتفاق قرض مع صندوق النقد بـ8 مليار دولار.. ساعدت في تخفيف أزمة تكدس البضائع بالموانئ وزودت الصادرات.. وده معناه إننا ماشيين على الطريق الصح بس المشوار لسه طويل.
من الآخر الاقتصاد المصري بينمو رغم التحدياتصحيح قناة السويس لسه قدامها تحديات كبيرة.. لكن لو استمرينا في الإصلاحات دي.. ممكن فعلاً نشوف تعافي حقيقي.
