روى الموسيقار عمرو سليم عدة مواقف عن قدراته في التعرف على الأشياء رغم فقدان بصره.
قال “سليم” في برنامج “واحد من الناس” المذاع على شاشة الحياة ويقدمه الإعلامي عمرو الليثي: “مرة كنت في العربية بتكلم مع مراتي وبنسمع مزيكا وكنا في إشارة مرور، وسامع كلاكسات ورانا، وحسيت إن حد بيشاورلها، ومعنديش أي سبب أقولك حسيت ازاي، معرفش مين إنما عندي شعور إن حد بيشاورلها أنها تعدي، فأنا قولتلها ماتسمعيش كلامه، وهي مكنتش لسه تعرفني أوي، عدت الإشارة وقالتلي أنزل هنا لازم تقولي عرفت ازاي.. أنا فعلا معرفش”.
تابع: “فيه واحدة جارتنا محجبة بتطلع تقعد معانا، مش راضية أبدا تقلع الحجاب قدامي، مش راضية تصدق إن أنا مش شايفها، مرة جابت برطمانين لكريم صباحي والتاني ليلي، والاتنين نفس كل حاجة، وقالتلي قولي نوع كل واحد فقولت، راحت قالت لمراتي مش قولتلك بيشوف والمصحف”.
اختتم: “أنا بشوف بعقلي، برتب العالم بتاعي بكل المعلومات اللي بتجيلي من حواسي وتوقعاتي.. أنا مش ببقى عارف المعلومة بتجيلي ازاي، يعني ساعات المعلومة بتجيلي علشان شغلت دماغي”.
