يا ترى ليه مصلحة الضرائب المصرية أعلنت عن مجموعة تسهيلات جديدة للمستثمرين، إيه هي التسهيلات دي وهتبقى صورة أو شكل إيه، وهل الموضوع ممكن يوصل لإزالة كل العقبات اللي بتواجه أي مستثمر عايز يخش السوق المصري.
في الساعات الأخيرة، أعلنت رشا عبد العال، رئيس مصلحة الضرائب المصرية، إن وزارة المالية ومصلحة الضرائب المصرية، وضعوا خطة لدعم المستثمرين، واللي هتبدأ بتذليل كل العقبات اللى بتواجههم عشان يقدروا يشتغلوا بكل أريحيه في السوق المصري.
والكلام ده طبعا، بيستخدف في المقام الأول دعم الاقتصاد الوطني، فهيبقي في حزمة تسهيلات ضريبية جديدة بتستهدف تعزيز بيئة العمل الضريبية، وزيادة فاعلية وحدة دعم المستثمرين التابعة لمكتب رئيس مصلحة الضرائب، واللي بتختص بالتعامل مع المشكلات والمعوقات اللي بتواجه المستثمرين، بما فيها تطبيق التشريعات الضريبية.
ونقدر نقول، إن اللي بيحصل ده مؤشر إيجابي جدا هيقدر يجذب أي مستثمر لمصر، خاصة وإن بيحصل تحول كبير في آليات العمل والتواصل من خلال الميكنة، فمصلحة الضرايب هتبدأ في استقبال الشكاوى والاستفسارات إلكترونيًا، وهترد عليها بسرعة وشفافية، وبعد كده ممكن اي مستثمر يقدر يقدم المستندات الخاصة له لتسهيل نشاطه، عشان بعد كده يحصل إصدار الآراء القانونية والتنفيذية الخاصة بالمشروعات بتاعتهم.
كمان، هيتم توفير أدلة إرشادية دقيقة للمستثمرين وهتتحدث باستمرار، وهتبقى متواجدة ومتاحة على الموقع الرسمي لمصلحة الضرائب المصرية، وده طبعا عشان تسهل فهم التشريعات والإجراءات الضريبية لأي مستثمر.
غير كل دته، هيتم إنشاء وحدة دعم المستثمرين، وفيها عناصر فنية وإدارية مؤهلة على مستوى كافة أنواع الضرائب، عشان نضمن جودة وسرعة الخدمات المقدمة، كمان تم التسديد على حرص المصلحة على التنسيق مع منظمات العمل المدني، والمؤسسات المهنية وجمعيات المستثمرين، بهدف تحديد المشكلات الضريبية اللي بتواجه المجتمع، والعمل على حلها بآليات مبتكرة وسريعة.
ضيف على كل ده إن هيتم التعاون المستمر مع منظومة الشكاوى الحكومية الموحدة التابعة لمجلس الوزراء عشان نضمن سرعة الاستجابة، وكمان التنسيق مع وزارة المالية عشان يبقي في قطاع اتصال مفتوحة دايما مع المستثمرين وجلسات استماع لتقييم استراتيجيات الدعم وتحديثها وفقا لأفضل الممارسات الدولية.
كمان، المستثمرين الجادين هيبقي لهم الأولوية للاستفادة من خدمات وحدة دعم المستثمرين، وده بيجي في إطار جهود المصلحة لتعزيز الالتزام الطوعي وإرساء علاقة قائمة على الثقة مع الممولين، لأن طبعا الهدف من كل ده هو تحقيق شراكة حقيقية ومستدامة بين مصلحة الضرائب والمجتمع الضريبي، عشان كده المصلحة هتواصل تقديم الدعم الكامل للمستثمرين عشان تضمن استمرارية النشاط الاقتصادي وتحقيق التنمية المستدامة.
وأي شكاوي للمستثمرين هيتم استقبالها عبر البريد الإلكتروني الخاص بوحدة دعم المستثمري، أو الخط الساخن للمصلحة رقم 16395، وده بهدف التسهيل عليهم وحل كل مشاكلهم.
وطبعا كل الخطوات هدفها واحد بس، وهو التسهيل على المستثمرين وتسريع إجراءاتهم عشان يعرفوا يشتغلوا كويس في مصر، وتقديم كل وسائل الدعم لهم، وهو ده بالظبط الاتجاه اللي بتسعى له الدولة دلوقتي.
