متابعينا الكرام في كل مكان أهلا وسهلا بكم على منصات بانكير، للتعرف على أهم التقارير اللي قدمتها وحدة أبحاث بانكير على مدار اليوم الثلاثاء 24 ديسمبر 2024.
منصات بانكير قدمت النهاردة أكتر من تقرير مهم في الشأن المالي والاقتصادي..والبداية كانت بتقرير مفرح عن تدفقات مصر الدولارية
وسلط التقرير الضوء على القفزة الجديدة في تحويلات المصريين بالخارج وقال لتقرير إن تحويلات المصريين العاملين بالخارج حققت قفزات متتالية عقب الإجراءات الإصلاحية في مارس 2024 والمقصود بيها تحرير سعر الصرف أو التعويم
ولفت التقرير إن تحويلات المصريين ارتفعت خلال شهر أكتوبر 2024 بمعدل 68.4% لتصل إلى 2.9 مليار دولار (مقابل نحو 1.7 مليار دولار خلال شهر أكتوبر 2023).
وأشار تقرير بانكير إن اجمالي التحويلات خلال الشهور العشر الأولى من 2024 ارتفعت بمعدل 45.3% لتصل إلى نحو 23.7 مليار دولار (مقابل نحو 16.3 مليار دولار يعني بزيادة أكتر من 7 مليار دولار
وشرح التقرير أسباب زيادة تحويلات المصريين بالخارج وفي مقدمتها تحرير سعر الصرف واختفاء السوق الموازية وخضوع سعر الدولار بالبنوك للعرض والطلب وفي نفس الوقت الزيادة بتأكد الثقة في القطاع المصرفي.
التقرير التالي اللي قدمته وحدة أبحاث بانكير كان بخصوص اللي بيحصل في إقتصادية قناة السويس وحكاية الـ64 مليار دولار
وقال التقرير إن مصر اخترعت في عهد السيسي فكرة المناطق الصناعية المتخصصة واختارت ليها اماكن جغرافية سحرية عشان تسوق إنتاجها .
ولفت بانكير إن المنطقة الاقتصادية لقناه السويس واحدة من المناطق اللي نجحت نجاح غير مسبوق
وسلط تقرير بانكير الضوء على تصريحات وليد جمال الدين، رئيس الهيئة العامة للمنطقة الاقتصادية لقناة السويس واللي كشف فيها ان الهيئة وقعت 30 مذكرة تفاهم، باستثمارات تقدر بـ 64 مليار دولار.
ولفت التقرير إنه جاري العمل حاليا على توقيع اتفاقية إطارية تانية لإحدى المشروعات باستثمارات 7.5 مليار دولار.
وحدة أبحاث بانكير كشفت إن السبب الرئيسي اللي خلي المنطقة لقناه السويس رقم واحد في استقبال الاستثمار الأجنبي هو موقعها المتميز بالقرب من ممر قناة السويس الملاحي العالمي واللي اداها ميزة نسبية كبيرة للمشروعات القائمة بالمنطقة، وقالت إن المنطقة الاقتصادية لقناة السويس تقع على مساحة 455 كم2 وبتساهم في توفير 100 ألف فرصة عمل مباشرة وغير مباشرة.
وشرح التقرير إن المنطقة بتعتبر مقصد واعد للمستثمرين لأن فيها 6 موانئ رئيسية وفيها 5 مشغلين رئيسيين للموانئ، ويمر بالمنطقة أهم ممر ملاحي حول العالم وهو قناة السويس بموقعها الفريد والمتميز لحركة التجارة العالمية وبيمر فيه 12% من التجارة العالمية ويمر بيها كمان 10% من البضائع المنقولة عبر البحر، ويمر بها 26 ألف سفينة سنويا.
وحدة أبحاث بانكير قدمت كمان النهاردة تقرير خاص عن التحديات الكبرى لاقتصاد مصر في 2025
واستهل التقرير بالتأكيد على إن 2024 كانت سنة صعبة جدًا على الاقتصاد المصري والتضخم لسه مرتفع والجنيه استمر في الضغط قدام الدولار مع وصوله في السوق الرسمية الى 51 جنيه ده غير إن الدين الخارجي وصل لمستويات جديدة والتحديات العالمية زي ارتفاع أسعار الفايدة الأمريكية وكمان الحروب الإقليمية زادت من تعقيد المشهد
ولفت التقرير إنه مع كل ده، كان فيه محاولات لإنقاذ الموقف.. زي المفاوضات مع صندوق النقد الدولي واللي بدأنا نشوف فيها مرونة أكتر كمان الدولة شغالة على بيع بعض الأصول لجذب استثمارات دولارية.. وكل دي خطوات هدفها تقليل الضغوط
وشرح التقرير إن فيه سيناريو متفائل بيقول إن مصر هتقدر تجذب استثمارات جديدة وتخفض عجز الموازنة وتحقق استقرار لسعر الجنيه لو ده حصل ممكن نشوف بداية تعافي حقيقي في النص التاني من 2025.. لكن السيناريو التاني بيقول إن لو ما فيش تحرك سريع وحاسم الأزمات ممكن تتفاقم .. يعنى التضخم يزيد والجنيه يضعف أكتر والضغط على المواطنين يفضل مستمر
التقرير الأخير اللي قدمته وحدة أبحاث بانكير كان بخصوص انطلاق محفظة جوجل الجديدة
وشرح التقرير إن “جوجل والت” هي محفظة رقمية هتشتغل في مصر بداية شهر يناير من السنة الجديدة 2025، واللي هتعتبر حل رقمي آمن وموثوق، هيتيح للمستخدمين حفظ وإدارة طرق الدفع الخاصة بيهم من خلال البطاقات أو بطاقات الهوية أو التذاكر والمفاتيح بسهولة.
ولفت التقرير إن محفظة Google بتعتبر تاني أداة مدفوعات رقمية أُطلقت في مصر، ومتوقع جدا انها تشتغل بعد أيام زي ما قولنا، وده بعد أيام من إتاحة شركة أبل العالمية لخدمة Apple Pay.
وشرح بانكير إن تطبيق Google Pay بيعتبر نظام للدفع الرقمي بيستخدمه الأشخاص لإجراء المعاملات المالية الإلكترونية بسهولة، وبشكل أساسي للدفع عبر الإنترنت عبر التطبيقات والمتاجر، ومن مميزاته التكامل مع مواقع التجارة الإلكترونية ودعم المدفوعات بين الأفراد وتسديد الفواتير عبر الإنترنت والدفع من خلال التطبيقات المختلفة مع إمكانية إرسال الفلوس بين الأصدقاء والعائلة، زي انستا باي كده.
وقال التقرير إنه بطرح محفظة جوجل الجديدة، هيكون قدام المستخدمين في مصر أنواع مختلفة من المحافط الإلكترونية اللي هتسهل معاملاتهم اليومية وتنجز لهم كتير وتسهل حياتهم أكتر، ومن هنا من حق كل عميل يختار المحفظة الأفضل له.
