في حاجات كتيرة حصلت في مصر بتاكد أن مصر ماشية في طريق الاصلاح الاقتصادي اللي محطوط لها بخطوات مضبوطة، وأن المواطن المصري هيبدأ يحس بالخطوات دي في الفترة اللي جاية.. ياتري اية اللي نفذته مصر في برنامج الاصلاح الاقتصادي.. واية بشاير نجاح البرنامج ده.. تابعونا للآخر وهتعرفوا التفاصيل في الفيديو ده
من فترة طويلة ومصر بدأت تنفيذ برنامج اصلاح اقتصادي مع صندوق النقد الدولي، والهدف من البرنامج ده هو اتخاذ خطوات حاجة وسليمة لعودة تصحيح الاقتصاد المصري واللي كان في الفترة اللي فاتت بيشهد تقلبات شديدة كانت بتاثر علي المناخ الاقتصادي في مصر بشكل كامل .
طيب الاقتصاد المصري كان ماشي ازاي قبل برنامج الاصلاح الاقتصادي؟.
مصر واحدة من الدول الكبيرة جدا، واللي المصروفات بتاعتها مرتفعة جدا وعندها برامج انفاق كبيرة جدا علي مجموعة كبيرة من القطاعات الخدمية اللي بتقدمها الدولة للمواطن المصري تحت بند الدعم، علشان كده أول الخطوات اللي الحكومة المصرية اتفقت عليها مع صندوق النقد الدولي هيا رفع الدعم بشكل تدريجي عن السلع والخدمات اللي بتقدمها الدولة المصرية للمواطنين، وفعلا مصر حطت خطة للرفع التدريجي للدعم عن كل القطاعات في الدولة، والبداية كانت برفع الدعم التدريجي عن البترول والمحروقات، وبعدها دخل قطاع الكهرباء وكل فترة الدولة بترفع اسعار البنزين والغاز الطبيعي والسولار بما يتماشي مع الارتفاعات العالمية في اسعار الطاقة وبما يتماشي برضوا مع خطة ترشيد الدعم الحكومي للمحروقات، ده غير كمان رفع الدعم عن شرائح الكهرباء واللي بدأ في مصر من كام سنة ومكمل معانا لحد 2028، وكل فترة الحكومة بتعلن عن تطبيق اسعار جديدة لشرائح الكهرباء في مصر.
خطة رفع الدعم عن الخدمات اللي بتقدمها الدولة طالت الخبز خصوصا أن النقطة دي بالذات كل الحكومات اللي مرت علي مصر مقدرتش تقرب منها، وعلي مدار سنين طويلة فضل رغيف الخبز خط احمر بالنسبة للحكومات، لحد ما الدولة اخدت القرار الصعب وقررت رفع اسعار العيش في مصر من 5 الي 20 قرش، وده قرار كان لابد منه خصوصا أن مصر بتدفع ارقام كبيرة جدا في دعم الخبز، ده غير كمان دع السلع التموينية، ولسه الحكومة مكملة في خطة رفع وترشيد الدعم ضمن خطوات الاصلاح الاقتصادي لمصر واللي بيهدف للنهوض ووضع بداية جديدة للاقتصاد المصري.
كل الجهود اللي قامت بيها الحكومة في ترشيد الدعم كان معاها جهود تانية لتشييد البنية التحتية في مصر، وده كان هدف من اهداف الحكومة لجذب استثمارات اجنبية مباشرة للدولة المصرية، خصوصا أن اي مستثمر اجنبي قبل ما يدخل اي دولة بيبص علي البنية التحتية الموجودة فيها عاملة أزاي، وده اللي عملته مصر وعملت ثورة كبيرة في تطوير الطرق والموانئي وقطارات السكك الحديدية، والمواني واللوجستيات.. والتطوير كمان طال كل شبر في الدولة المصرية، وحاليا مصر بقت واحد من اهم واكبر الدول في العالم استقبالا للاستثمارات الأجنبية المباشرة .
كمان الإصلاحات الاقتصادية اللي عملتها مصر هيأت ليها الطريق عشان تأسس صناعة قوية وتبني مدن زكية ومناطق صناعية وسياحية و عمرانية غير مسبوقة ودا هيرفع في النهاية من حصيلة الدولار ويقوى الجنيه ويخلي اقتصاد مصر قوى وقادر يواجه التحديات.
